Aste honetan Koldo Amestoy ipuin kontalariaren bisita izango dugu eskolan. Asteartean, hilak 25, arratsaldeko zazpietan euskarazko emanaldia izango dugu, eta hurrengo egunean, 26an alegia, frantsesez.
Ezaguna zaizu Koldo Amestoy? Hala ez bada, egizu klik haren izenaren gainean eta zoaz beraren blogera, han jasoko duzu ikusteko parada izango dugun ikuskizunaren (Biderdi) eta beste hainbaten berri .
Ez ahaztu, bada, asteartean hitz ordua duzula Koldo Amestoyrekin eskolako sotoan dagoen aretoan. Denok zaudete gonbidatuta. Ez galdu aukera. Ziur nago han elkar ikusiko dugula.

Berlin ez dago hain urrun- Anjel Lertxundi

Hau dugu Fouquetek margotutako diptikoa, Lertxundiren narrazioaren protagonista. Ezkerrekoa Berlingo Gemäldegalerie museoan eta eskuinekoa Amberesko Arte Ederretako museoan ikus ditzakegu zuzenean.
Oraindik ez baduzu narrazioa irakurri, ekin iezaiozu, eta 72 orrialdea amaitzen duzunean, eten eta pentsa ezazu zein bukaera emango zeniokeen zeuk. Zein izan liteke margoaren historia? Ausartu zaitez proposamenak egiten. Jar ezazu idatziz erantzunetan. Ea zeinek idazten duen originalena!!
Gero irakur ezazu Lertxundik kontatzen diguna. Eta azkenik benetako historia ezagutzeko erdarazko (gaztelaniazko bat) web-orriren batera jo beharko duzu, izan ere euskaraz Anjel Lertxundiren bertsioaz gain ez dut ezer aurkitu.
Esaguzu zein duzun margolanik gustukoena, ekar iezaguzu ikasgelara beraren argazki bat edo interneteko helbideren bat aurkitu dezagun eta zeurekin batera goza dezagun geuk ere.

Anbar grisa

Badakizu zer den anbar grisa? Zein den bere jatorria? Zertarako erabiltzen den? Zentzumenekin lotura zuzena duela, besterik ez dizut esango. Argazkiari erreparatzen badiozu, berehala konturatuko zara zein zentzumenekin. Jakin-mina piztu dizut? Ikertu, bada, ikertu...

ANIA MINER

Ania Miner dugu neska gazte hau, gogoratzen? Eskolan entzun dugu Argiakoek egin zioten elkarrizketaren pasarte bat. Dena ulertu ez bazenuen, zaude lasai, orain nahi beste alditan entzuteko parada izango baituzu.

GUBBIO, Juan Garzia Garmendia

Juan Garziak 1993an argitaratu zuen Gubbio narrazioa Itzalen itzal liburuan. Aspalditxo, beraz, ezta? Ez estutu, ez zarete deskubritzaile berantiar bakarrak. Hemen duzue esaterako Gorka Bereziartuak Argiako azken alean argitaratu duen kritika. Irakur ezazue, baina ez edonola; estrategia ezberdinak probatuz.
Kritika horretan, Gorka Bereziartuak Volgako Batelariak ( literatur bloga) blogean Juan Garziari eginiko elkarrizketa aipatzen du. Izan ere, berak aitortzen digunez hantxe piztu zitzaion Itzalen itzal irakurtzeko gogoa. Aukera duzue zeuek ere elkarrizketa irakurtzeko eta Juan Garzia pixka bat hobeto ezagutzeko.

Ardoa dastatzen

Gustuko duzue ardoa? Jakina, arabarrak izanik, gogoko izateaz gainera adituak izango zarete gaian guztiok; ez dut zalantzarik. Baina, baliteke, bat edo beste trebatu beharrean egotea oraindik. Gaurkoan "ardo dastatze birtuala" egitea proposatzen dizuet, gero benetakoa, lagunartean egin dezazuen, denak ahoa bete hortz uzteko.
Ez dizuet ezer berririk irakasten, esaten badizuet, bost zentzumenetatik lauk parte hartzen dutela halako "cata" edo dastatzeetan. Zoli, beraz, hasteko, gure ikusmena, hurrengo, usaimena, eta azkenik, dastamena eta ukimena. Ikasgaia jasotzeko klikatu koparen gainean:

Ongi etorri guztiok nire blogera!!

Agur bero bat guztioi!!
Neure blogean parte hartzen gonbidatu nahi zaituztet. Neuk ere, neure aldetik interesgarriak iruditzen zaizkidan proposamenak egingo dizkizuet.
Gure arteko komunikazioa errazteko asmotan egina dago blog hau.

Ondo has gaitezen paisaia eder baten argazkia oparitu nahi izan dizuet, Burgosko iparraldean, Ebroren arroiletan egina da, udazkeneko egun koloretsu batean. Gozamena begietarako!! Beste zentzumenei ere gustua ematekotan, zoazte hara bertara eta ikusiko duzue egia dela, ez zarete damutuko.